Sot është përuruar konvikti numër 8 në Qendrën e Studentëve në Prishtinë.
Në këtë ceremoni morën pjesë ministri i Arsimit ,Shkencës dhe Teknologjisë Shyqiri Bytyqi, ministri i Tregtisë dhe Industrisë Bajram Hasani, zëvendësministri i Kulturës Rinisë dhe Sportit Rexhep Hoti, Rektori i Universitetit të Prishtinës Marjan Dema, Kryetari i Komisionit për Arsim Ismajl Kurteshi.
Me këtë rast drejtori i Qendrës së Studentëve, Fatmir Sfishta ka thënë se ndërtimi i këtij konvikti ka kushtuar 1.5 milionë euro dhe se është financuar nga MASHT-i, “Kapaciteti i tij është 155 dhoma me biblioteka, leximore, salla për rekreacion. Me shtimin e numrit të këtyre kapaciteteve, numri i studentëve në konvikte arrin në 4 mijë”, ka thënë ai.
“Ne si menaxhment nuk do të ndalemi së punuari në rritjen e kapaciteteve tjera të nevojshme. Ky zgjerim i kapaciteteve padyshim kërkon përkrahjen dhe bashkëpunimine e MASHT-it, bashkëpunim i cili nuk ka munguar.
Poashtu edhe një bashkëpunim më serioz me KK e Prishtinës, lidhur me sqarimin e pronësisë për ndërtimin e konvikteve si dhe përshpejtimin e dhënies së lejeve urbanistike dhe ndërtimore” ka theksuar z.Sfishta.
Ndërsa ministri i Arsimit, Shkencës dhe Teknologjisë, Shyqiri Bytyqi ka thënë se studentët e meritojnë të kenë kushte sa me te mira në mënyrë që ata vetëm të mësojnë. “Ne do të kemi bashkëpunime tjera që edhe më tutje t’i përmirësojmë kushtet e studenteve por të kemi edhe konvikte të reja”, ka deklaruar Bytyqi.
